Book review

 BUDDHISM IN CHOLA NADU

Dr.B. JAMBULINGAM 

பல்வேறு மதங்களை உள்ளடக்கிய நாடு நம் இந்திய நாடு . அவற்றுள் ஒன்றான புத்தமதம் புத்தரால் இந்தியாவில் தோற்றுவிக்கப்பட்டது . சீனா , ஜப்பான் , இலங்கை ஆகிய நாடுகளில் இன்றும் பல மக்களால் பின்பற்றப்படும் புத்தமதம் , அசோகச் சக்கரவர்த்தியால் பின்பற்றப்பட்டு இந்தியா முழுவதும் பரப்பப்பட்ட மதமாகும் . சோழ நாட்டில்  சோழர்கள் ஆட்சியின் போது புத்த மதம் எவ்வாறு விளங்கியது என்பதை விளக்குகிறது இந்நூல்  .

         சோழ நாட்டைப் பற்றிய அறிமுகத்துக்கு பின் புத்த மதம் எவ்வாறு சோழ நாட்டில் பரவியது என்பதை தெளிவாக விளக்குகிறது . புத்த மதத்தைப் பற்றி சங்க கால நூல்களில் வரும் குறிப்புகள் மற்றும் பல்வேறு புலவர்கள் கூறும் தகவல்களை வரிசைபடுத்தி  இருக்கிறார் ஆசிரியர் . சிலப்பதிகாரம்  ,மணிமேகலை , திருக்குறள் ஆகியவற்றுடன் வெளிநாட்டுப் பயணிகள் மற்றும் கல்வெட்டுகளில் காணப்படும் புத்தமதம் பற்றிய செய்தியை அறிந்து கொள்ள முடிகிறது . இராஜராஜன் சோழன் , இராஜேந்திர சோழன் மற்றும் பிற மன்னர்கள் புத்த விகாருக்கு கொடுத்த கொடையைப் பற்றிய செய்திகளுடன் தஞ்சை பெரிய கோயில் , தாராசுரம் ஆகிய சைவக் கோயில்களில் காணப்படும் புத்தரின் உருவத்தையும் நாம் அறிந்து கொள்ள முடிகிறது . 

        சோழ நாட்டில் எங்கெல்லாம் புத்தரின் உருவசிலைகள் இருக்கிறது என்பதையும்  , அந்த உருவத்தின் அமைப்பையும் விளக்குவதுடன் அச்சிலையை உள்ளூர் மக்கள் எவ்வாறு குறிப்பிடுகிறார்கள் என்பதையும் தற்போது நடக்கும் வழிபாட்டையும் தெளிவாக விளக்குகிறார் . பல்வேறு இடங்களில் எடுக்கப்பட்ட சிலைகள் தற்போது எங்கே வைக்கப்பட்டுள்ளது என்பதையும் , அவர் நேரில் சென்று கள ஆய்வு செய்த சிலைகளின் தற்போதைய நிலை பற்றியும் குறிப்பிடுகிறார் . ஆசிரியர் இதில் குறிப்பிடும் ஊரில் நேரில் சென்று ஆய்வு செய்த போது அவருக்கு உதவியவர்கள் பெயரையும் குறிப்பிட்டு இருப்பது அவரின் சிறந்த பண்பை காட்டுகிறது . அழகிய புகைப்படத்துடன் மிகச் சிறந்த ஆய்வு நூலை எளிமையாக்கி  நமக்கு அளித்துள்ள ஆசிரியருக்கு வாழ்த்துக்களும் நன்றியும் .

CHETAK HORSE ( SCOOTER )

 முகலாய பேரரசர் அக்பர்(Akbar ) தனது ஆட்சிப்பகுதியை விரிவுபடுத்திய போது (வட இந்தியாவை ) பெரும் இடையூராகவும் , வீரமிக்க எதிராளிகளாகவும் விளங்கியவர்கள்  ராஜபுத்திர வம்சத்தினர்கள் . ராஜபுத்திர  மன்னர்களில் இரண்டாம் உதய் சிங்கும் அவர் மகன் மஹாராணா பிரதாப் சிங்கும் அக்பருக்கு கட்டுப்பட மறுத்த பெரும் வீரர்கள் . கி பி 15ம் நூற்றாண்டில் ராஜபுத்திர வம்சத்தில் தோன்றிய இரண்டாம் உதய்சிங் சித்தொகரை  (Chittogarh ) தலைநகராக கொண்டு மேவாரை ( Mewar ) ஆட்சி செய்து வந்தார் . மேவார் பகுதி என்பது இன்றைய ராஜஸ்தானின் ஒரு பகுதியாகும் .  முகலாய பேரரசர் அக்பர் 1567 ஆம் ஆண்டு தனக்கு கட்டுப்பட மறுத்த சித்தோகர் கோட்டையை முற்றுகையிட்டார் . மிகப் பெரிய கோட்டை மற்றும் ராஜபுத்திரர்களின் வீரத்தாலும் இப்போர் சுமார் நான்கு மாதங்கள் ( 23 October 1567 – 23 February 1568) நடந்தது , இறுதியில்  அக்பர் சித்தோகர் (chittogarh) கோட்டையை கைப்பற்றினார் . இப்போரில் உதய் சிங் உயிர்தப்பியதோடு ஆரவல்லி மலைப் பகுதிக்கு தப்பினார் . மேவாரின் தலைநகர் சித்தோகர் கைப்பற்றப்பட்ட போதிலும் இந்த ராஜ்யத்தின் பெரும்பகுதி உதய் சிங்கின் ஆதிக்கத்தில் இருந்தது . எனவே  தலைநகரை இழந்த உதய் சிங் புதிய தலைநகரை உருவாக்கினார் . அவர் பெயரில் உருவாக்கப்பட்ட தலைநகரே இன்றைய உதய்பூர் ( Udaipur ) . நீர் மேலாண்மையின் முக்கியத்துவத்தை உணர்த்த உதய் சிங் நகர் முழுவதும் பல ஏரிகளை உருவாக்கினார் . இன்றும் பல ஏரிகளை கொண்டு இந்நகரம் விளங்குவதால் ஏரிகள் நகரம் ( City Of Lakes )  என்று இன்றும் புகழ்ப்படுகிறது .    இரண்டாம் உதய் சிங்கின் மறைவுக்கு பின் அவர் மகன் மஹாராணா பிரதாப் சிங் ஆட்சிக்கு வந்தார் . இவர் 1540 ம் ஆண்டு மே 9ம் தேதி ராஜஸ்தானின் கும்பல்கரில் ( Kumbhalgarh / Kumbhalmer ) பிறந்தவர் . இவரின் தலைமையில் மேவார் சிறப்புற்று  விளங்கிய போது அக்பர் மீண்டும் மேவாரை பிடிக்க  படையெடுத்தார் . ஜூன் 18ம் தேதி 1576 ம் ஆண்டு அம்பரை சேர்ந்த மான் சிங்( Man Singh Of Amber ) என்பவர் தலைமையில் அக்பரின் படை  கிளம்பியது . அரவல்லி ( Aravalli )மலைத்தொடரில் இருந்து 40 km தொலைவில் அமைந்த உதய்பூரை பிடிக்க ஹால்டிகட் (Haldighati ) என்னும் மலையில் உள்ள கணவாய் வழியாக படை வந்தது . இம்மலை முழுவதும் மஞ்சள் நிற மண் காணப்படுவதால் , ( haldi ) ஹால்டி என்றால் இந்தியில் மஞ்சள் என்ற பொருளில் ஹால்டிகாட்  என்று இம்மலை அழைக்கப்படுகிறது . அக்பரின் பெரும் படையை மஹரானா பிரதாப் சிங்கின் சிறிய படை வீரத்தோடு எதிர்கொண்டது . ராணா பிரதாப் சிங்கின் மிகப்பெரிய பலமாக கருதப்பட்டது அவரது சேடக் ( CHETAK ) குதிரை  . மார்வாரி குதிரை இனத்தை சேர்த்த சேடக் குதிரை அழகு , திறமை மற்றும் புத்திசாலித்தனம் ஆகியவற்றை ஒருங்கே கொண்டு இருந்தது . இப்போரில் முகலாய படைத்தளபதியான மான் சிங்கை கொல்ல ராணா முயன்ற போது ராணா படுகாயமுற்றார் . அவரது சேடக் குதிரையும் காலில் காயமுற்றது எனினும் தன் தலைவர் காயமுற்று சுயநினைவு இழந்த நிலையில் அவரை சுமந்து கொண்டு போர் களத்தை விட்டு பகைவர்களிடமும் சிக்காமல் ஓடி , ஆற்றை கடந்து அவரை கொண்டு சேர்த்துவிட்டு கீழே விழுந்து மடிந்து இறந்தது . சரியான நேரத்தில் ராணா பிரதாப்பை மீட்டு , அவர் உயிரை பகைவரிடம் இருந்து காப்பாற்றியது . தன் வலியை பொருட்படுத்தாமல் காயப்பட்ட கால்களுடன் ஓடி தன் எஜமானை காப்பாற்றிய நிம்மதியுடன் இறந்தது . சுமார் 4 மணி நேரமே போர் நடத்தி அக்பர் வென்றாலும் , அவர் இப்போரில் முழுவெற்றி அடையாத்ததற்கு சேடக் குதிரையே காரணம் . அன்றில் இருந்து இக்குதிரை பற்றி பல நாட்டுப்புற கதைகள் உலவுகின்றன . பல நூற்றாண்டுகளாக சேடக் குதிரை கதைகளின் நாயகனான திகழ்கிறது . ராணா பிரதாப் சிங் , தன் உயிரை காப்பாற்றிய சேடக் குதிரையை புதைத்த இடத்தில் ஒரு நினைவுச் சின்னம் (நவீன நடுகல் ) எழுப்பியுள்ளார் . சேடக்கை புதைத்த இடத்தில் சிறு மேடை அமைத்து அதன் மேல் மண்டபம் போல் அழகான மாடம் அமைத்துள்ளனர் . அதன் நடுவே ஒரு அடிக்கு, நான்கு புறம் கொண்ட சிறு கல் தூண் அமைத்து, ஓவ்வொரு பக்கத்திலும் சிறு சிற்பம் அமைத்துள்ளனர் . இச்சின்னமும் , ஹால்டிஹட் போர் நடத்த இடமும் தற்போது ராஜஸ்தான் தொல்லியல் துறை கட்டுப்பாட்டில் உள்ளது .  இக்குதிரையின் வீரமும் விசுவாசமும் புத்திசாலித்தனமும் இன்றும் போற்றப்படுகிறது .  இக்குதிரையின் நினைவில் நம் இந்திய அரசாங்கம் ராணுவ வானூர்திக்கு சேடக் ஹெலிகாப்டர் ( Chetak Helicopter ) என்றும் , ஒரு தனியார் நிறுவனம் தன் இரு சக்கர வாகனத்திற்கு   (Chetak Scooter ) சேடக் ஸ்கூட்டர் என்றும் பெயர் வைத்து மரியாதை செய்துள்ளது . ராணா பிரதாப் சிங், ஹல்டிகட் போர் நடந்து சில ஆண்டுகளுக்கு பின் மீண்டும் அக்பர்  கைப்பற்றிய சித்தோகர் கோட்டை மற்றும் பிற பகுதிகளை கைப்பற்றினார் . இவர் ஆட்சியில் மேவார் ராஜ்ஜியம் சிறப்புற்று விளங்கியது .

ஜனவரி 19ம் தேதி 1597ம் ஆண்டு ராணா மறைந்தாலும் அவரையும் அவரின் சேடக்  குதிரையையும் உதய்பூர் மக்கள் மறக்கவில்லை . ராஜபுத்திர மன்னர்கள் பல பேர் இருந்தாலும் வரலாற்றில் இன்றளவும் ராணா பிரதாப் சிங்கிற்கு தனியிடம் உண்டு .  உதய்ப்பூர் சாலை நடுவே சேடக் குதிரையும் சிற்பம் வைக்கப்பட்டுள்ளது . இன்றும் ராணாவின் மன உறுதியையும் முகலாயர்களுக்கு அடிபணியாத வீரத்தையும் மறக்காத மக்கள் அவரின் பிறந்தநாளை அரசு விடுமுறையாக அறிவித்து கொண்டாடி வருகின்றனர் .தங்கள் குழந்தைகளுக்கு பிரதாப் என்று இன்றும் பெயர் சூட்டி , அவரைப் பற்றி பல கதைகள் பேசி மகிழ்கின்றனர் .  மேலும் மஹாரானா பற்றி அறிந்துகொள்ள அருங்காட்சியகம் அமைத்து அதில் அவரின் வாழ்க்கை வரலாறு சொல்லும் ஓவியக்காட்சியும் , ஒளி ஒலி காட்சியும் , அவர் பயன்படுத்தி பொருட்களும் வைக்கப்பட்டுள்ளது . இங்கு அவரைப்போன்றும் , அவர் சேடக் குதிரைமேல் அமர்ந்து முகலாயர்களிடம்  சண்டை போடும் காட்சிகள் அனைத்தும் பெரிய சிலைகளாக  அமைத்துள்ளனர் . நாம் அனைவரும் அறிந்துகொள்ள வேண்டிய வீர வரலாறு இது .

                                                                              CHATAK HORSE

                                                  

          

                                                                           CHATAK SAMADHI

                 

                                                                                                                                                                                                                             

                                                              

                                                               

                                                                    HALDIGHAT

                                            

                                                 

                                                 MAHARANA PRATAB MUSEUM

                                                

                                            

                                                       

                                             

AKBARI MASJITH , AMBER , JAIPUR

 இந்து மன்னர் இஸ்லாமிய மன்னருக்கு தன் பெண்ணை திருமணம் செய்து கொடுத்ததுடன் ஒரு மசூதியும் கட்டினார் என்ற வரலாற்றை அறிந்து கொள்ளலாம் . ராஜஸ்தான் மாநிலத்தின் தலைநகர் ஜெய்ப்பூரில் இருந்து 13 km தொலைவில் அம்பர்கோட்டைக்கு (Amber Fort ) அருகில் ஜமா மஸ்ஜித் (Jama Masjid ) என்னும் பழமையான மசூதி அமைந்துள்ளது . கிபி 1569 ஆம் ஆண்டு அக்பரின் உத்தரவை ஏற்று ராஜா பர்மால் ( Raja Bharmal ) என்பவரால் இந்த மசூதி கட்டப்பட்டுள்ளது . வட இந்தியாவில் தனது ராஜ்ஜியத்தை விரிவாக்க முடிவு செய்த அக்பர் , இரண்டு யுக்திகளை பயன்படுத்தினார் . பகைவர்களை வீரத்தாலும் மற்ற நாட்டவர்களை அன்பாலும் வெல்ல திட்டமிட்டார் . போர் புரிவதால் இருபுறமும் உயிர்சேதமும் பொருட்சேதமும் ஏற்படுவதால் அதை தவிர்க்க விரும்பி , திருமண உறவாலும்  எல்லைகளை விரிவாக்க முடிவு செய்தார் . அதுவும் குறிப்பாக ராஜபுத்திர மன்னர்களுடன் அவர் திருமண உறவு ஏற்று போர்கள் இன்றி தனது எல்லையை பாதுகாக்க முடிவு செய்தார் . அக்பர் , இஸ்லாமியர் ராஜபுத்திரார்களோ இந்துக்கள் . ஆனால் அக்பர் அதைப் பற்றி எல்லாம் கவலைப்படவில்லை . ராஜ்ஜியத்தை விரிவாக்க மட்டுமே எண்ணினார் . அம்பர் சமஸ்தானத்தை முகலாய ராஜ்யத்துடன் இணைக்க திருமணமே சிறந்த வழி என முடிவு செய்தார் . மேவார் மன்னர் ராணா உதய்சிங் தவிர மற்றவர் ராஜபுத்திர மன்னர்கள் திருமண உறவுக்கு ஒப்புக்கொண்டனர் . இதன் முதல் முயற்சியாக அக்பர் , அம்பர் ராஜ்ஜியத்தின் 22வது ராஜபுத்திர மன்னரான ராஜா  பர்மால் (1498- 27 சன 1574 ) என்பவரின் மகளான ஹீரா கன்வாரியை மணம் புரிந்தார் .  அக்பர் திருமணத்திற்கு முன்பும் ஹீரா கன்வாரியை மதம் மாற சொல்லவில்லை அதுமட்டுமின்றி அரண்மனையில் இந்துவாக வாழவும் , பூஜைகள் செய்யவும் அனுமதி கொடுத்ததுடன் சில பூஜைகளில் அவரும் கலந்துகொண்டார் என்றும் கூறப்படுகிறது .  செப் 20 ,1569ம் ஆண்டு ஹீராவுக்கு ஆண் குழந்தை பிறந்தது . அக்குழந்தையே பின்னாளில் ஜஹாங்கீர் என்ற புகழ் பெற்ற முகலாய மன்னராவார் . அம்பரின் மன்னரான ராஜா பர்மால் தன் மருமகனான அக்பரின் வேண்டுகோளுக்கிணங்க அம்பர் கோட்டைக்கு அருகில் மஸ்ஜித் ஒன்றை கட்டி அதற்கு அக்பரின் பெயரே சூட்டியுள்ளனார் . " அக்பரி மஸ்ஜித் " என்றும் , " ஜமா மஸ்ஜித் " என்றும் அழைக்கப்பட்டுள்ளது . மஸ்ஜித் என்பது இஸ்லாமியர் அனைவரும் ஒன்றுகூடி இறைவனை தொழுகை செய்யும் இடம் ஆகும் .இதனையே தமிழில் பள்ளிவாசல் என்றும் அரபுமொழியில் மஸ்ஜித் என்றும் அழைக்கப்படுகிறது . ராஜபுத்திர ராஜ்ஜியத்தில் இஸ்லாமியருக்கும் தொழுகை செய்ய இடம் வேண்டும் என்று நோக்கத்தில் இந்த மசூதி கட்டப்பட்டுள்ளது . மசூதியின் நுழைவாயில் தாண்டி சென்றால் முகப்பில் ஏழு வளைவுகளைக் கொண்டு அவற்றின் மைய வளைவு மற்ற வளைவுகளை விட பெரியதாகவும் உள்ளது . இம்மசூதி இன்னும் பயன்பாட்டில் உள்ளது . இக்கட்டிடம் ராஜஸ்தான் தொல்லியல்துறையின் கட்டுப்பாட்டில் உள்ளது .

                                             

                                         

                                          

                                                           

                                                            

                                                           

        

SAS - BAHU TEMPLE ,UDAIPUR, RAJASTHAN

 ராஜஸ்தான் உதய்பூரில் இருந்து 20 கிலோமீட்டர் தொலைவில் உள்ள நகடா (Nagda ) என்னும் ஊரில் மிக அற்புத வேலைப்பாடுகளுடன் கூடிய சாஸ் பஹு (Sas - Bahu ) கோயில் அமைந்துள்ளது . நாகதரா (Nagahrada ) என்னும் பெயரே மறுவி நகடா ஆனதாக கருதப்படுகிறது . சிலத்தியவின் ( Siladitya ) தந்தையான நாகத்யாரால் ( Nagaditya ) நிறுவப்பட்டது இவ்வூர் . கிபி 646ம் நூற்றாண்டில் இருந்து ஒன்பதாம் நூற்றாண்டு வரை இவ்வூர் சிறப்புற்று விளங்கியதோடு , மேவாரின் தலைநகராகவும் இருந்திருக்கிறது .

இவ்ஊரில் இக்கோயிலை சாஸ் பஹு என்றும் ,  மாமியார் - மருமகள் கோயில் என்றும் அழைக்கிறார்கள்  கி.பி 11 நூற்றாண்டில்  கச்ச்வாஹா வம்சத்து (Kachchhwaha ) மகிபாலன் என்னும் மன்னனின் மனைவி விஷ்ணு பக்தை அவளின் வழிபாட்டிற்காக மன்னர் விஷ்ணு கோயிலை கட்டியதாகவும் , மன்னனின் மருமகள் அதாவது இளவரசனின் மனைவி சிவபக்தை அவரின் வழிபாட்டிற்காக சிவாலயத்தை கட்டியதாகவும் அதனால் இக்கோயிலை மாமியார் - மருமகள் கோயில் என பெயர் பெற்றதாகவும் கருதப்படுகிறது . முதலில் விஷ்ணு கோயிலை கட்டியதால் சாஸ் என்பது கோயிலின் பெயரில் முதலில் வருகிறது .  சாஸ்பாகு என்ற பெயரே சகஸ்ரபாகு என்னும் பெயரில் இருந்து மறுவியதாகவும் ஆயிரம் கைகள் உடைய இறைவன் என்ற பொருளில் அழைக்கப்பட்டதாகவும் கருதப்படுகிறது . பத்தடி உயரம் உள்ள மேடையில் முழு கோயிலும் அமைந்துள்ளது . பெரிய கோயிலுக்கு அருகே மற்றொரு சிறிய கோயிலும் அதைச் சுற்றி சிறுசிறு கோயில்களும் காணப்படுகின்றன . அவற்றில் சில கோயில்களுக்கு மேடை மட்டுமே உள்ளன இருப்பினும்  பெரிய கோயிலின் சுற்றுச்சுவர் முழுவதும் ஆடல் மகளிரும் , பல கதைகளை விளக்கும் சிற்பங்களும் , யானையின் உருவங்கள் என பலதும் பொறிக்கப்பட்டுள்ளது . முகமதியர் படையெடுப்பின் போது கோயில் முழுதும் சிதைக்கப்பட்டு மூலவர் சிலை காணாமல் போனதாக கருதப்படுகிறது .  கோயில் முழுவதும் நுணுக்கமான வேலைப்பாடுடன் கூடிய அலங்காரத்துடன் அமைந்துள்ளது . இக்கோயிலில் தற்போது வழிபாடு ஏதும் நடப்பதில்லை , இக்கோயில் மத்திய அரசு தொல்லியல் துறையால் பராமரிக்கப்பட்டு வருகிறது .

KHAB BRIDGE ,SPITI VALLEY , HIMACHAL PRADESH

 காப் என்பது சட்லஜ் நதியின் கரையில் அமைந்திருக்கும் ஒரு சிறிய கிராமம் . இமயமலையின் இரண்டு பெரும் ஆறுகளான சட்லெஜ் மற்றும் ஸ்பிட்டி ஆறுகள் ஒன்றோடு ஒன்று இணையம் இடம் தான் காப் . சட்லெஜ் ஆறு திபெத்திய மானசரோவரில் உள்ள ஏரியில் உற்பத்தியாகி ஏராளமான இமயமலை பள்ளத்தாக்குகளை கடந்து பஞ்சாப் வரை பாய்கிறது . பஞ்சாபில் பாயும் ஐந்து நதிகளில் மிகப்பெரிய நதி சட்லெஜ் . இதில் உற்பத்தி செய்யும் மின்சாரம் வடஇந்தியா தொழிற்சாலைகளின்  முக்கிய ஆதாரமாக திகழ்கிறது .  

 இமயமலையின் பனிப்பாறைகள் உருகி ஸ்பீட்டி  நதியாக பாய்கிறது . இமயமலை மக்களின் குடியிருப்புகள் எல்லாம் இந்த ஸ்பீட்டி நதியை ஒட்டியே அமைந்திருக்கிறது . இந்த இரு பெரும் நதிகள் சங்கமம் ஆகும்பள்ளத்தாக்கின்  மேலே அமைக்கப்பட்டுள்ள பாலம் தான் காஃ பாலம் (Khab Bridge ) . இந்த இரு நதிகளும் பெரிய மலைகளுக்கு நடுவே உள்ள பள்ளத்தாக்கில் சங்கமம் ஆகிறது அதனால் இரு மலைகளுக்கு நடுவே நடக்கும் இந்த சங்கமத்தை காண இரண்டு கண்கள் போதாது . இந்தப்பாலம் இரும்பினால் மிக உறுதியாக கட்டப்பட்டுள்ளது . இங்கு நின்று புகைப்படம் எடுக்காத வண்டிகளே இல்லை . இதற்காண பயண சாலை பாதைகளும் மலைகளை குடைந்தே அமைத்திருப்பதை காண முடிகிறது . அமைதியான அழகான இடத்தில்  இரு நதிகளின் சங்கமத்தை வாழ்வில் ஒரு முறையேனும் காண வேண்டும் .